依兩日留咗好多眼淚，
見到依位母親的片段我真係完全崩潰了...
我都係一個普通「女人仔」，亦係一位母親
我好愛依個地方但依家真係好陌生，
但6.12的團結令我相信香港未死。
多謝所有前線的人，辛苦了，
你地的付出，天上和地上的人都知道，
願流血事件不要再發生！
轉自張超雄議員fb:
「我一個女人仔，為左啲咩嘢呀？我唔憎你哋，我知道你哋為左份工。我知你哋有任務。但係真係收隊啦好冇呀？我都係人哋阿媽，你哋都有阿媽。班細佬都有阿媽。你哋唔好咁好無？你當我求下你哋放低手上嘅武器，好唔好？佢哋係細佬仔黎咋！佢哋十零歲咋。你點打得落手咖？轟轟見血！你哋都係人哋爸爸黎咖！你將來都會做人爸爸咖！你都有細佬咖！你咁樣打呢啲細佬，你收隊啦！
夠啦，煙霧彈我都食左啦。我食左你哋幾個煙霧彈啦。我都有付出代價咖！一人行一步好冇？好冇呀？我唔係衝擊你哋呀。我無武器咖！你咁樣對住一個女人仔，你過意得去嗎？
想當初，你哋考警察學校，你唔係為左高薪厚職咖，係咪？你哋都為左一點正義感咖，係咪？我唔係壞人黎咖！我唔係十惡不赦！你叫佢哋停啦！好冇呀？你叫佢哋停啦！我求求你哋！」
Search